SHSKUK mohon mungesën e tretësirave për infuzion, siguron furnizim të qëndrueshëm
Shërbimi Spitalor dhe Klinik Universitar i Kosovës (SHSKUK) ka reaguar ndaj dezinformatave të publikuara në lidhje me mungesën e tretësirave për infuzion, duke siguruar publikun se furnizimi me NaCl 0.9%- 500 mililitra ka qenë dhe vazhdon të jetë i qëndrueshëm.
Në një njoftim për media, SHSKUK ka sqaruar se në janar, stoku i tyre përfshinte 54,610 copë tretësira për infuzion, të cilat janë shpërndarë vazhdimisht në të gjitha klinikat e QKUK-së dhe spitalet e përgjithshme. Gjithashtu, institucioni ka siguruar se ka sasi të mjaftueshme të sistemeve të infuzioneve, kanillave, ampulave deksametazon dhe diklofenak, të cilat gjithashtu janë shpërndarë në mënyrë të rregullt.
“Poashtu, ka sasi të mjaftueshme me sisteme të infuzioneve dhe kanillave, ampula deksametazon dhe diklofenak, e që në vazhdimësi shpërndahen në QKUK dhe 7 spitalet e përgjithshme,” thuhet në njoftim.
SHSKUK thekson se në shkurt janë furnizuar edhe me 16,200 copë tretësira infuzioni, duke garantuar që asnjëherë nuk ka pasur mungesë në njësitë shëndetësore.
Për të vërtetuar gjendjen e furnizimit, SHSKUK fton mediat, gazetarët dhe shoqërinë civile të verifikojnë informacionin në Sektorin për Furnizim me Barna dhe Material Shpenzues, si dhe në klinikat e QKUK-së dhe spitalet e përgjithshme.
“Andaj, SHSKUK, apelon tek mediat gazetarët dhe shoqëria civile, para se të shpërndajnë informata të pa verifikuara, paraprakisht të marrin informacionin zyrtar dhe të verifikojnë gjendjen në Sektorin për furnizim me barna dhe material shpenzues, klinikat e QKUK-së dhe spitalet e përgjithshme,” thuhet në njoftim.