Përurohet shërbimi i Hemodializës në Rahovec

Ky projekt, i përuruar sot, shënon një hap të rëndësishëm për përmirësimin e shërbimeve shëndetësore në këtë komunë, duke ofruar një shërbim të domosdoshëm për pacientët që kanë nevojë për hemodializë.

“Ky shërbim jetik tani është shumë më afër, duke shmangur udhëtimet e lodhshme, disaorëshe dhe disa herë në javë drejt qyteteve të tjera për trajtim,” deklaroi ministri Vitia, duke vlerësuar rëndësinë e këtij shërbimi për komunitetin lokal.

Në këtë rast, ministri shprehu falënderime për Shërbimin Spitalor dhe Klinik Universitar të Kosovës (SHSKUK) dhe Komunën e Rahovecit për kontributin e dhënë në realizimin e këtij projekti.

Ministri Vitia uroi gjithashtu stafin shëndetësor për punë të mbarë dhe pacientët për trajtime të suksesshme, duke theksuar përkushtimin e institucioneve për të përmirësuar më tej infrastrukturën shëndetësore në vend.

Ky zhvillim pritet të ndikojë pozitivisht në jetën e dhjetëra pacientëve që më parë përballeshin me vështirësi të mëdha për të marrë trajtime të rregullta, duke sjellë një lehtësim të ndjeshëm për ta dhe familjet e tyre.