PDK nga Rahoveci: Fermerët kanë nevojë për mbështetje, jo për kriza të njëpasnjëshme
Kandidatë dhe përfaqësues të PDK-së kanë zhvilluar një takim me qytetarë në Rahovec, duke vënë në fokus sfidat me të cilat përballen fermerët dhe vreshtarët e kësaj komune.
Foto: Ilustrim
Gjatë aktivitetit u theksua se Rahoveci është simbol i punës, prodhimit dhe bujqësisë në Kosovë, ku puna e fermerëve dhe vreshtarëve përbën identitetin dhe krenarinë e qytetit. Megjithatë, sipas PDK-së, sektori i bujqësisë po përballet me mungesë të mbështetjes institucionale dhe investimeve të nevojshme.
Nga Rahoveci u kërkua më shumë përkrahje për fermerët përmes investimeve në sistemet e ujitjes, zgjerimit të tregut për prodhimet vendore, përmirësimit të infrastrukturës rrugore dhe krijimit të më shumë mundësive për të rinjtë.
PDK vlerësoi se qytetarët po përballen me krizë ekonomike, ndërsa fermerët me vështirësi të shumta në sektorin e bujqësisë. Po ashtu, u tha se vendi ka nevojë për stabilitet politik dhe politika që mbështesin zhvillimin ekonomik.
“Duhet ta ndryshojmë Kosovën. Stop krizës. Ndrysho Kosovën”, ishte mesazhi i përcjellë nga Rahoveci në kuadër të fushatës zgjedhore të PDK-së.
