Vazhdojnë garën “kokë më kokë”- Si u votuan Shala e Muharremaj në fshatrat e njëri-tjetrit?!
Të dielën, më 12 tetor 2025, qytetarët e Suharekës votuan për të zgjedhur kryetarin e ri të komunës, në kuadër të zgjedhjeve lokale të mbajtura në gjithë vendin.
Nga gjithsej katër kandidatë që ishin në garë për të parin e kësaj komune, sipas rezultateve preliminare të publikuara nga Komisioni Qendror i Zgjedhjeve (KQZ), më së shumti vota kanë siguruar Bali Muharremaj nga Aleanca për Ardhmërinë e Kosovës (AAK) dhe Ardian Shala nga Lidhja Demokratike e Kosovës (LDK).
Të dy kandidatët pritet të përballen në balotazhin e 9 nëntorit, në një garë që vlerësohet të jetë tejet e ngushtë dhe konkurruese, duke marrë parasysh rezultatin e afërt në raundin e parë dhe bazën e fortë elektorale që secili ka në komunën e Suharekës.
Një detaj interesant është se të dy kandidatët kanë arritur të sigurojnë përqindje të konsiderueshme votash edhe në fshatrat prej nga vijnë rivalët e tyre politikë.
Bali Muharremaj, që vjen nga fshati Gjinoc, ka arritur të marrë 36.14% të votave në Mushtisht, fshatin e Ardian Shalës, duke u renditur pas këtij të fundit, i cili në vendlindjen e tij mori 47.12% të votave.
Nga ana tjetër, në Gjinoc – fshatin e Muharremajt – Ardian Shala ka marrë vetëm 15.58% të votave, ndërsa Muharremaj ka fituar bindshëm me 63.90%.
Këto rezultate tregojnë një ndarje të qartë elektorale, por edhe faktin se të dy kandidatët kanë arritur të depërtojnë në zonat e kundërshtarit, çka e bën balotazhin edhe më të paparashikueshëm.
Zgjedhjet e 9 nëntorit pritet të jenë vendimtare për të ardhmen politike të komunës së Suharekës, ndërsa garës po i paraprin një atmosferë dinamike dhe mobilizim i shtuar nga të dyja kampet.