Kurti e bën “sefte”, fotografohet për fushatën e zgjedhjeve të 28 dhjetorit

10.12.2025

Kryeministri në detyrë i Kosovës, Albin Kurti, ka njoftuar sot, e mërkurë, se ka filluar përgatitjet për fushatën elektorale për zgjedhjet e parakohshme të Kuvendit, të cilat do të mbahen më 28 dhjetor 2025.

Kurti, përmes një videoje të publikuar në rrjetet sociale, ka treguar se procesi i përgatitjes ka nisur me fotografitë që do të përdoren gjatë fushatës elektorale. Ai bëri të ditur se fushata do të fillojë më 17 dhjetor dhe do të përfundojë në orën 06:59 më 28 dhjetor, sipas ligjit për zgjedhje.

Zgjedhjet e jashtëzakonshme parlamentare të 28 dhjetorit janë shpallur pas shpërbërjes së Kuvendit, duke ofruar mundësi për qytetarët që të përcaktojnë përbërjen e re të legjislativit të vendit. Në këto zgjedhje do të marrin pjesë partitë dhe koalicionet politike të certifikuara nga Komisioni Qendror i Zgjedhjeve, ndërsa votimi do të bëhet si brenda vendit ashtu edhe për diasporën kosovare.

Këto zgjedhje konsiderohen vendimtare për formimin e institucioneve të reja dhe për vazhdimin e projekteve strategjike të vendit, përfshirë zhvillimin ekonomik, përmirësimin e infrastrukturës dhe avancimin drejt integrimit evropian.

Autoritetet zgjedhore kanë njoftuar qytetarët që të informohen për listat e votuesve dhe qendrat e votimit, duke siguruar një proces transparent dhe të drejtë për të gjithë pjesëmarrësit.