Ekipet e Specializuara të FSK-së nisin operacionin për kërkimin e trupit të 33 vjeçarit në liqenin e Ujmanit
Kërkimet për trupin e pajetë të mërgimtarit 33-vjeçar, i cili dyshohet se është hedhur nga ura në Liqenin e Ujmanit, kanë hyrë në ditën e tretë.
Në vendngjarje kanë qenë të angazhuara njësite të Policisë së Kosovës, ekipet e kërkim-shpëtimit si dhe zhytës profesionistë, të cilët po punojnë pa ndërprerë për lokalizimin e trupit, por deri tani, përpjekjet nuk kanë dhënë rezultat.
Zëdhënësja e Ministrisë së Mbrojtjes, Liridona Gashi ka bërë të ditur për Telegrafin se FSK-ja sot do të fillojë kërkimin te Liqeni i Ujmanit në Zubin Potok.
Ministri në detyrë i Mbrojtjes, Ejup Maqedoni ka bërë me dije se Njësitet e specializuara të zhytjes dhe kërkim shpëtimit të Forcës së Sigurisë së Kosovës janë angazhuar për kërkimin e trupit të mërgimtarit në liqenin e Ujmanit, në komunën e Zubin Potokut.
“Forca e Sigurisë së Kosovës në kuadër të detyrave të saj thelbësore ka edhe mbështetjen e autoriteteve civile. Në këtë aspekt në bashkëpunim me Agjencinë e Menaxhimit të Emergjencave, Policinë e Kosovës dhe bashkërendim me KFOR, ekipet e specializuara të FSK kanë filluar operacionin e kërkimit në liqenin e Ujmanit me synimin që sa më shpejtë të nxirret trupi i mërgimtarit dhe ti lehtësohet dhimbja familjes.”, ka shkruar mes tjerash ai.