Shpërthimi i zjarrit në kodrinat e fshatit Peqan dhe Sllapuzhan, policia jep detaje

Ka disa ditë që zjarret janë përhapur në disa rajone të vendit, ndërsa përhapjes së zjarrit i kanë ‘kontribuar’ edhe temperaturat e larta si dhe djegia e sipërfaqeve hamullore.

Gjendja problematike është paraqitur edhe në rajonin e Suharekës, në disa fshatra të komunës.

Gjatë ditës së djeshme sipas raportit të policisë është raportuar se si pasojë e prishjes së një përçuesi elektrik ka shpërthyer një zjarr ku është përhap në kodrinat e fshatit Peqan dhe Sllapuzhan.

Njësitet e zjarrfikësve kanë tentuar që ta lokalizojnë dhe shuajnë zjarrin.

“INCIDENT ZJARRI
Fsh. Peqan, Suharekë 04.08.2021-14:05. Raportohet se, si pasojë e prishjes së një përçuesi elektrik ka shpërthyer një zjarr ku është përhap në kodrinat e fshatit Peqan dhe Sllapuzhan. Njësitet e zjarrfikësve janë duke tentuar që ta shuajnë zjarrin”, thuhet në raportin e Policisë së Kosovës.

Kujtojmë se nga 24 vatra aktive të zjarrit që ishin në Komunën e Suharekës që nga dita e dielë, tanimë të gjitha janë shuar, ka bërë të ditur Enver Shabani, Drejtor i Shërbimeve Publike, Mjedis dhe Emergjencë në Komunën e Suharekës.

Shabani ka thënë se përballja me zjarrin për katër ditë me radhë ishte e vështirë, dhe e pamundur pa ndihmë nga zjarrfikësit e komunave të tjera dhe vullnetarë të qytetit.