Rriten gjobat për shkelësit e Ligjit antiduhan, nga 1 mijë deri në 3 mijë euro
Ministria e Shëndetësisë ka bërë të ditur se po vazhdon pa kompromis zbatimi i Ligjit për Kontroll të Duhanit, në të gjithë territorin e Republikës së Kosovës. Sipas MSH-së nga tani e tutje gjobat për të gjithë ata që shkelin Ligjin për Kontrollin e Duhanit, do të jenë nga 1 mijë deri në 3 mijë euro.
Foto: Ilustrim
MSH po ashtu bënë të ditur se nga janari deri me datë 14.03.2024 janë shqiptuar gjithsej 1328 gjoba.
“Muajin e parë të vitit gjobat kanë qenë minimale, me qëllim që të nxisim bashkëpunim të ndërsjellë pa i ngarkuar bizneset, ndërsa tash e tutje gjobat për ata që thyejnë ligjin do të jenë maksimale, prej 1000 deri në 3000 euro”, thuhet në njoftimin e MSH-së.
Ndryshe, duhani vret më shumë se 8 milionë njerëz çdo vit në botë, duke përfshirë rreth 1.3 milionë jo-duhanpirës të cilët janë të ekspozuar ndaj tymit të dorës së dytë;
Në çdo 6.5 sekonda një njeri vdes në botë nga pasojat e duhanpirjes;
Duhani vret gjysmën e përdoruesve të tij. Është shkaktari i dytë i vdekjeve në botë;
Pirja e duhanit vlerësohet se shkakton: 67% të gjitha vdekjeve nga kanceri i mushkërive; 34% të vdekjeve nga sëmundjet kronike të frymëmarrjes dhe 8% të vdekjeve nga sëmundjet kardiovaskulare.
