Aktakuzë naj dy personave për tentativë vrasjeje në Prizren – Konflikti nisi në një furrë buke

Sipas aktakuzës, i pandehuri E.K. akuzohet për kryerjen e veprës penale “Vrasje në tentativë”, ndërsa B.H. akuzohet për “Dhënien e ndihmës kryesve pas kryerjes së veprave penale”, në përputhje me dispozitat përkatëse të Kodit Penal të Republikës së Kosovës (KPRK).

Ngjarja kishte ndodhur në orët e para të mëngjesit, rreth 02:40 të datës 24 mars 2024, kur të pandehurit ishin përfshirë në një përleshje me të dëmtuarin I.B., fillimisht në një furrë buke në rrugën “Rifat Ukimeri”, si pasojë e një mosmarrëveshjeje të mëhershme. Pasi ndërhyrja e pronarit të furrës dhe e të pandehurit të dytë B.H. e kishte qetësuar situatën dhe të përfshirët ishin nxjerrë jashtë lokalit, konflikti kishte vazhduar më vonë.

Të dy të pandehurit ishin larguar me veturën e tyre në drejtim të rrugës “Gazmend Zajmi”, ku ishin ndjekur nga i dëmtuari I.B. Pas një ndërprerjeje në udhëkryq, E.K. kishte dalë nga automjeti dhe kishte goditur me mjet të mprehtë – thikë, duke i shkaktuar lëndime të rënda trupore të dëmtuarit.

Pas sulmit, të pandehurit ishin larguar nga vendi i ngjarjes me automjetin e tyre. Prokuroria e akuzon B.H. se ka ndihmuar në shmangien e zbulimit dhe arrestimit të autorit kryesor, duke e transportuar E.K.-në në drejtim të shtëpisë së tij, menjëherë pas incidentit.

Në aktakuzë, Prokurori i çështjes ka propozuar që pas shqyrtimit gjyqësor dhe vlerësimit të provave, të pandehurit të shpallen fajtorë për veprat penale që u vihen në barrë dhe të dënohen në përputhje me legjislacionin penal në fuqi.