Arrestohet një person që tentoi të korruptojë policët me 100 euro pas një kundërvajtjeje
Një ngjarje e pazakontë ka ndodhur pas mesnate në rrugën “Meshari” në Fushë Kosovë, ku një qytetar kosovar është arrestuar nga Policia e Kosovës pasi tentoi të korruptojë zyrtarët policorë.
Rasti ka ndodhur rreth orës 00:10 të datës 10 tetor 2025, kur i dyshuari, pas një kundërvajtjeje në trafik, ka ofruar 100 euro ryshfet me qëllim që të shmangë masat ligjore ndaj tij.
Policia ka reaguar menjëherë dhe ka arrestuar personin në fjalë në vendin e ngjarjes.
“Sipas raportit të Policisë, i dyshuari mashkull kosovar ka ofruar 100 euro zyrtarëve policorë pas një kundërvajtjeje në trafik. Me vendim të prokurorit kompetent, ai është dërguar në mbajtje,” thuhet në raportin 24-orësh të Policisë së Kosovës.
Rasti është cilësuar si tentim për korrupsion aktiv ndaj personit zyrtar dhe ndaj të dyshuarit do të merren masa të mëtejshme ligjore. Policia e Kosovës ka theksuar se do të vazhdojë të veprojë me zero tolerancë ndaj çfarëdo forme të korrupsionit.