Arrestohen dy persona për vjedhje të rëndë, sekuestrohen para

01.11.2025

Policia e Kosovës ka njoftuar se dy persona janë dërguar në mbajtje për 48 orë, të dyshuar për veprën penale “Vjedhje e rëndë” në Mitrovicë të Veriut.

Ngjarja ka ndodhur më datë 01.11.2025, rreth orës 04:50, në rrugën “Dervarska”, ku dy persona të dyshuar hynë me forcë në një lokal dhe vodhën një shumë parash, sipas deklarimeve të ankuesit.

Njëri nga të dyshuarit është ndaluar menjëherë nga punëtorët e një kompanie të sigurimit fizik, ndërsa tjetri u largua nga vendi i ngjarjes. Pas një pune hetimore-operative, policia ka arritur ta arrestojë edhe të dyshuarin e dytë, duke i dërguar të dy në stacionin policor për intervistim.

Të arrestuarit janë:

  • K.C., 28 vjeç
  • Z.M., 42 vjeç

Gjatë kontrollit, tek të dyshuarit është gjetur dhe sekuestruar një shumë e parave që dyshohet se lidhet me këtë rast. Hetimet e deritanishme tregojnë se të dyshuarit mund të jenë të përfshirë edhe në dy raste të tjera të vjedhjeve të raportuara së fundmi, dhe njëri nga të dyshuarit e ka pranuar këtë gjatë intervistimit.

Prokurori i Shtetit ka urdhëruar ndalimin e tyre për 48 orë, ndërsa rasti është regjistruar si “Vjedhje e rëndë”.

Policia e Kosovës thekson se mbetet e përkushtuar në zbatimin e ligjit dhe arrestimin e të gjithë personave që kryejnë apo tentojnë të kryejnë vepra penale.