Gjuajtje me armë në një aheng familjar në Shtime – Arrestohet 33-vjeçari
Policia e Kosovës ka arrestuar një person për shkak të të shtënave me armë zjarri gjatë një ahengu familjar në fshatin Petrovë të Shtimes.
Foto: Ilustrim
Ngjarja ka ndodhur të dielën, më 29 qershor 2025, rreth orës 11:10, kur stacioni policor në Shtime ka pranuar një informatë për të shtëna në këtë zonë.
Njësitet policore kanë reaguar menjëherë dhe kanë dalë në vendin e ngjarjes, ku kanë kontaktuar me pronarin e ahengut. Gjatë intervistimit në vend, ai ka pranuar se kishte shtënë me një armë zjarri.
I dyshuari, G.R., 33 vjeç, është shoqëruar në stacionin policor në Shtime dhe është intervistuar në prani të avokatit të tij. Prokurori i shtetit është njoftuar për rastin dhe ka urdhëruar ndalimin e të dyshuarit për 48 orë.
Rasti është duke u trajtuar nga Sektori i Hetimeve në Stacionin Policor në Shtime.
Apel i Policisë për qytetarët:
Policia Rajonale e Ferizajt rikujton se përdorimi i armëve të zjarrit, sidomos gjatë ahengjeve apo tubimeve familjare, përbën rrezik të madh për jetën dhe sigurinë publike.
Qytetarëve u bëhet thirrje të shmangin veprime të tilla të kundërligjshme dhe të bashkëpunojnë me Policinë e Kosovës për të parandaluar raste që mund të përfundojnë me pasoja tragjike.
Për çdo informacion apo veprim të dyshimtë, qytetarët mund të lajmërojnë policinë përmes:
📞 192
📞 0290/389-111
📲 Aplikacionit “Lajmëro Policinë”
Të dhënat e raportuesve ruhen me konfidencialitet të plotë.
