Fillon vaksinimi nga ajri kundër tërbimit te kafshët e egra
Agjencia e Ushqimit dhe Veterinarisë (AUV) ka njoftuar se ka nisur fushatën vjeshtore të vaksinimit ajror kundër tërbimit, që ka për synim parandalimin e përhapjes së kësaj sëmundjeje te kafshët e egra në territorin e Republikës së Kosovës.
Foto: Ilustrim
Vaksinimi po realizohet përmes shpërndarjes së vaksinave nga ajri në zona të përcaktuara, ndërsa monitorimi i procesit po bëhet nga inspektorët veterinarë të AUV-së në Aeroportin Ndërkombëtar të Prishtinës “Adem Jashari”.
Kujdes për fëmijët dhe qytetarët në zonat përkatëse
AUV i bën thirrje qytetarëve të jenë të kujdesshëm nëse hasin kapsulat e vaksinave të hedhura nga ajri, të cilat janë të destinuara ekskluzivisht për kafshët e egra dhe nuk duhet të preken nga njerëzit.
Në veçanti, familjet që kanë fëmijë dhe jetojnë në zonat ku shpërndahen vaksinat, këshillohen t’i udhëzojnë fëmijët që të mos luajnë apo të mos i prekin këto vaksina, për të shmangur çdo kontakt të panevojshëm.
Qëllimi: Mbrojtja e shëndetit publik dhe atij veterinar
Fushata është pjesë e një strategjie afatgjate të Agjencisë për parandalimin e përhapjes së sëmundjes së tërbimit, e cila përveç rrezikut për kafshët, paraqet edhe një kërcënim serioz për shëndetin publik.
AUV fton qytetarët që për çdo paqartësi apo informacion shtesë të kontaktojnë institucionin përmes kanaleve zyrtare të komunikimit.
