Arrestohet 21-vjeçari E.H., dyshohet për disa vjedhje të rënda nga automjetet

25.12.2025

Njësiti i Hetimeve i Stacionit Policor në Fushë Kosovë ka arrestuar sot një person të dyshuar për përfshirje në disa raste të vjedhjeve të rënda që kanë ndodhur kryesisht në këtë rajon.

Sipas Policisë, rastet janë raportuar nga qytetarë të ndryshëm, ku dyshohet se nga tetë automjete të ndryshme janë vjedhur mjete pune dhe gjësende të tjera me vlerë.

Si rezultat i punës intensive hetimore, policia ka arritur të identifikojë dhe arrestojë një person të dyshuar, si dhe të realizojë bastisjen e vendbanimit të tij. Gjatë bastisjes janë gjetur dhe sekuestruar mjete pune dhe gjësende të ndryshme të vjedhura, të cilat më pas u janë kthyer pronarëve legjitimë.

I dyshuari, E.H., mashkull, 21 vjeç, shtetas i Republikës së Kosovës, me vendim të prokurorit është dërguar në mbajtje për 48 orë. Ndërkohë, hetuesit policorë janë duke vazhduar veprimet e nevojshme procedurale për ndriçimin e plotë të të gjitha rasteve të lidhura me këtë çështje.

Policia e Kosovës ka ritheksuar përkushtimin e saj për parandalimin dhe luftimin e veprave penale, duke ftuar qytetarët që të raportojnë çdo rast të dyshimtë.