Qeveria ndan 2 milionë euro për fluturimet që lidhin mërgatën me Kosovën
Qeveria në detyrë e Kosovës ka ndarë 2 milionë euro për mbështetjen e linjave të fluturimit për destinacionet që shërbejnë mërgatën kosovare.
Foto: Ilustrim
Vendimi është marrë në mbledhjen elektronike të mbajtur sot, në kuadër të Masës 4.5 “Mbështetja e Mërgatës” të Pakos së Ringjalljes Ekonomike.Përveç mbështetjes për fluturimet, Qeveria ka ndarë mjete edhe për përfaqësimin e Kosovës në gara ndërkombëtare shkencore.
Shoqata e Matematikanëve të Kosovës do të përfitojë 8 mijë euro për pjesëmarrjen në Olimpiadën e 67-të të Matematikës 2026 në Shangai të Kinës.Ndërkaq, organizata “Kosova Global Talent Center” është mbështetur me mbi 70 mijë euro për pjesëmarrjen e 26 nxënësve në finalen e NEO Science Olympiad në New York të SHBA-së.
Po ashtu, Shoqata e Kimistëve të Kosovës do të përfitojë 3 mijë e 500 euro për pjesëmarrje në Olimpiadën Ndërkombëtare të Kimisë 2026 në Tashkent të Uzbekistanit.Në këtë mbledhje elektronike, Qeveria ka aprovuar edhe listën e anëtarëve potencialë të Komisionit të Pranimit për Ministrinë e Punëve të Brendshme.
