Dramë në Duhël, arrestohet 50-vjeçari i armatosur pas orësh negociata me Policinë
Një aksion i gjatë dhe i tensionuar i Policisë së Kosovës ka përfunduar me arrestimin e një burri të kërkuar.
Foto: Ilustrim
Burri dyshohej për dhunë në familje, e cila kishte ndodhur më 20 prill 2025. N.G., 50-vjeçar, u lokalizua në fshatin Duhël të Suharekës pas disa ditësh në arrati dhe u arrestua pas disa orësh negociata intensive, pasi ishte i armatosur me disa armë zjarri dhe municion.
Sipas raportimeve të Gazeta Sinjali, i dyshuari u gjet rreth orës 14:30 nga sektori i hetimeve në një objekt ndihmës pranë shtëpisë së tij. Në momentin e mbërritjes së patrullës policore, N.G mbante në duar një pushkë gjysmë automatike dhe një pistoletë, duke refuzuar kategorikisht të dorëzohej dhe duke shfaqur një rrezik serioz për sigurinë e oficerëve të policisë dhe të vetë atij.
Përballë kësaj situate kritike, Policia e Kosovës angazhoi njësi të shumta, të cilat zhvilluan negociata të zgjatura dhe intensive me të dyshuarin për disa orë. Vetëm rreth orës 18:00, pas përpjekjeve të vazhdueshme, policia arriti ta bindte 50-vjeçarin të vetëdorëzohej pa shkaktuar përshkallëzime të mëtejshme të situatës. Gjatë operacionit, në vendngjarje u sekuestruan një pushkë gjysmë automatike (kalibër 7.62 mm), një pistoletë Zoraki M 906T (kalibër 7.65 mm), 24 fishekë të kalibrit 7.62 mm, 7 fishekë të kalibrit 7.65 mm dhe 9 gëzhoja të kalibrit 7.62 mm.
Tashmë, përveç akuzave fillestare për “Dhunë në Familje” dhe “Lëndim Trupor”, ndaj N.G është ngritur edhe akuza për “Mbajtje në pronësi, kontroll apo posedim të paautorizuar të armëve”. Me urdhër të Prokurorit të Shtetit, i dyshuari është ndaluar për 48 orë dhe hetimet në lidhje me këtë rast të rëndë janë duke vazhduar.
