Mosmarrëveshje në trafik në Suharekë, një person dyshohet se sulmoi dy persona dhe u kap me armë

13.07.2026

Një mosmarrëveshje në trafik në fshatin Duhël të Suharekës ka përfunduar me një incident, ku një person dyshohet se ka sulmuar fizikisht dy persona dhe u ka ekspozuar një armë zjarri.

Sipas raportit të Policisë së Kosovës, ngjarja ka ndodhur më 12 korrik 2026, rreth orës 08:30. I dyshuari, shtetas i Kosovës, pas konfliktit fizik me dy viktimat, dyshohet se ka nxjerrë armën para tyre.

Gjatë kontrollit, policia ka gjetur dhe konfiskuar një pistoletë me një fishek në posedim të të dyshuarit.

Personit të dyshuar i është ofruar trajtim mjekësor, ndërsa me urdhër të prokurorit është liruar në procedurë të rregullt. Rasti është iniciuar si “Posedim ilegal i armës” dhe “Lëndim i lehtë trupor”.