Dogana e Kosovës mbledh 1.3 miliardë euro të hyra, 71 milionë më shumë se vitin e kaluar
Dogana e Kosovës ka arkëtuar rreth 1.3 miliardë euro të hyra deri në gusht të këtij viti, duke shënuar rritje prej rreth 71 milionë eurosh krahasuar me periudhën e njëjtë të vitit të kaluar.
Foto: Ilustrim
Drejtori i Doganës së Kosovës, Agron Llugaliu, ka thënë në një intervistë për Ekonomia Online se lufta kundër ekonomisë joformale dhe reformat e ndërmarra në sistem kanë ndikuar në rritjen e të hyrave.
Ndër reformat e këtij viti ai ka përmendur kalimin e terminaleve doganore nga menaxhimi privat në atë shtetëror, si dhe nisjen e deklarimit të mallrave para arritjes.
Llugaliu ka bërë të ditur gjithashtu se Dogana ka arritur të përgjysmojë kohën e nevojshme për procedimin e eksporteve, ndërsa janë krijuar edhe lehtësira për prodhuesit, përfshirë lirimin nga taksat për makineritë prodhuese, lëndën e parë dhe burimet e energjisë.
Sa i përket luftës kundër kontrabandës, ai ka thënë se nuk ka dallime të mëdha mes rajoneve të Kosovës, por ka veçuar trekëndëshin kufitar Kosovë–Maqedoni e Veriut–Serbi si zonën me rrezikun më të lartë.
Sipas tij, performanca e Doganës këtë vit paraqet një trend pozitiv në rritjen e të hyrave dhe përmirësimin e procedurave doganore.
