Dy persona gjenden pa shenja jete në Prizren dhe Dragash, dyshohet për vetëvrasje
Dy persona janë gjetur pa shenja jete gjatë së dielës në rajonin e Prizrenit, ndërsa sipas informacioneve fillestare të Policisë së Kosovës, në të dy rastet dyshohet se bëhet fjalë për vetëvrasje.
Foto: Ilustrim
Zëdhënësi i Policisë për rajonin e Prizrenit, Shaqir Bytyqi, ka bërë të ditur se rasti i parë është raportuar rreth orës 15:40 në rrugën “Turgut Özal” në Prizren, ku në banesën e saj është gjetur pa shenja jete një grua rreth 54-vjeçare. Ekipi i Emergjencës ka konstatuar vdekjen e saj në vendin e ngjarjes.
Ndërkaq, rasti i dytë është raportuar rreth orës 17:50 në një zonë pyjore në fshatin Restelicë të Dragashit, ku është gjetur pa shenja jete një burrë rreth 68-vjeçar.
Sipas Policisë, bazuar në rrethanat fillestare të evidentuara në vendngjarje, në të dy rastet dyshohet për vetëvrasje.
Me urdhër të prokurorit kompetent, trupat e pajetë janë dërguar në Institutin e Mjekësisë Ligjore për obduksion, ndërsa rastet janë iniciuar si “Hetim i vdekjes” dhe po vazhdojnë të hetohen.
