Ismet Munishi – trajner i SC Gjilanit: Vitin tjetër synojmë titullin kampion pa dyshim

Ismet Munishi – trajner i SC Gjilanit: Vitin tjetër synojmë titullin kampion pa dyshim
Çlirim Gashi

13.03.2021 / Sport

Ismet Munishi e ka nisur punën e tij si trajner te SC Gjilani. Tekniku njohur kosovar është prezantuar para futbollistëve këtë të shtunë (13 mars) nga presidenti i klubit Florim Zuka.

Munishi më pas zhvilloi edhe seancën e parë stërvitore para duelit të rëndësishëm në fundjavë ndaj Trepçës ’89, ndërkohë në një prononcim për Gazetën “Sheshi”, ai theksoi se objektivi për këtë takim dhe takimet tjera do të jetë vetëm fitorja.

“Në çdo ndeshje do luajmë për fitore. U prezantova dhe njoftova para futbollistëve për herë të parë. Punuam në pjesën taktike para ndeshjes ndaj Trepçës ’89 aq sa patëm mundësi”, deklaroi fillimisht Munishi.

Ai gjithashtu theksoi se ndjehet krenar që është duke trajnuar në një klub si Gjilani dhe disa futbollistë të cilët kanë karrierë të bujshme sportive.

“Mund të them që jam krenar që jam trajner i një klubi si Gjilani dhe që jam trajner i disa futbollistëve këtu, të cilët janë fantastik dhe kanë patur karrierë fantastike”, potencoi Munishi.

Ndër të tjerash ai zbuloi edhe objektiin madhor për vitin tjetër.

“Këtë vit synojmë të marrim më të mirën e mundshme, kurse vitin tjetër synojmë titullin kampion pa dyshim”, tha Munishi.

Në fund ai gjithashtu bëri një premtim për tifozërinë e këti klubit “Skifterat”.

“Skifterave i’u premtoj që do ta bëjmë futbollin më të bukur, do të luftojmë për klubin e tyre të zemrës dhe shpresojmë që të rikthehen sa më shpejtë në tribuna dhe të në përkrahin, pasi që rezultatet janë më të vështira për t’u arritur kur ata nuk janë pranë nesh. Janë lojtari ynë i 12-të dhe mezi pres të rikthehen në stadium për të krijuar atmosferë”, përfundoi Munishi.

RAPORTO