Aksident tragjik në Rahovec – humb jetën motoristi pas përplasjes me veturë
Një aksident i rëndë trafiku me fatalitet ka ndodhur mbrëmjen e së dielës në rrugën “UÇK” në Rahovec, ku janë përfshirë një veturë me targa vendore dhe një motoçikletë që drejtohej nga një mashkull kosovar.
Sipas njoftimit të Policisë së Kosovës, ngjarja ka ndodhur rreth orës 20:25, kur për shkaqe ende të paqarta është shkaktuar përplasja mes dy mjeteve. Si pasojë e aksidentit, drejtuesi i motoçikletës ka pësuar lëndime të rënda trupore.
Fillimisht, viktima është dërguar në Qendrën Kryesore të Mjekësisë Familjare (QKMF) në Rahovec për ndihmë të parë, ndërsa më pas është transferuar në spitalin rajonal të Gjakovës. Për fat të keq, mjekët nuk kanë mundur ta shpëtojnë, pasi ai ka ndërruar jetë si pasojë e plagëve të marra. Vdekjen e tij e ka konstatuar mjeku kujdestar.
Ndërkohë, edhe drejtuesi i veturës ka pësuar lëndime dhe është dërguar për trajtim mjekësor. Me urdhër të prokurorit të shtetit, ai është ndaluar për 48 orë, ndërsa trupi i pajetë i viktimës është dërguar në Institutin e Mjekësisë Ligjore (IML) në Prishtinë për obduksion.
Policia e Kosovës ka njoftuar se kanë nisur hetimet për të zbardhur rrethanat dhe shkaqet e sakta të këtij aksidenti tragjik.