Sveçla: Në pikat kufitare po lëshohet dokumenti për hyrje-dalje, vendimi nuk pezullohet deri në largimin e barrikadave

Derisa ka publikuar edhe një video në faqen e tij në “Facebook”, ka theksuar se ky vendim do të implementohet deri sa të bëhet largimi i të gjitha barikadave në Veri dhe të sigurohet liria e lëvizjes së qytetarëve.

Kujtojmë se, dje mbrëma, Qeveria e Republikës së Kosovës ka shtyrë vendimin për reciprocitetin për një muaj, pasi konsultimeve që pati me ambasadorin amerikan, Jeff Hovenier.

Njoftimi i plotë i ministrit Sveçla:

FILLON ZBATIMI I VENDIMIT TË QEVERISË SË REPUBLIKËS SË KOSOVËS PËR PAJISJE ME DOKUMENTIN PËR HYRJE-DALJE NË PIKAT KUFITARE

Tashmë ka filluar shpërndarja e dokumentit për hyrje-dalje në pikat kufitare të Republikës së Kosovës, me përjashtim në pikat Jarinje dhe Bërnjak të cilat vazhdojnë të jenë të mbyllura përshkak të barrikadave që janë vendosur nga strukturat ilegale serbe.

Të gjithë personat që posedojnë dokumente të lëshuara nga autoritetet e Serbisë, do të pajisen me dokumentin hyrje-dalje e cila ka afat vlefshmërie 90 ditë brenda territorit të Republikës së Kosovës.

Ky vendim do të vazhdojë të implementohet derisa të largohen të gjitha barrikadat dhe të sigurohet liria e lëvizjes së qytetarëve dhe mallrave. Në momentin e largimit të të gjitha barrikadave dhe pengesave, ky vendim do të pezullohet deri më 1 shtator 2022.