Sukses ndërkombëtar për FSK-në: Qendrim Berisha shpallet kursanti më i mirë në Mbretërinë e Bashkuar

Berisha është përzgjedhur si kursanti më i mirë ndërkombëtar, duke fituar çmimin prestigjioz “Comera Cup”, përballë pjesëmarrësve nga vende si Gana, Estonia dhe Kuvajti, njofton Klankosova.tv.

Sipas njoftimit të FSK-së, kursi është i ndarë në tri module kryesore:

• Moduli i parë përfshin njohuritë e përgjithshme mbi municionet, duke filluar nga përbërja kimike, procesi i prodhimit dhe identifikimit të municioneve, kalibrat e ndryshëm, deri tek pajisjet më të sofistikuara si mortajat, minat dhe raketat anti-tank si Javelin dhe NLAW.
• Moduli i dytë fokusohet në planifikimin dhe ndërtimin e depove të municioneve, duke respektuar doktrinat dhe rregulloret ndërkombëtare, përfshirë inspektimet dhe transportet ndërkufitare.
• Moduli i tretë përmban aspektet praktike dhe teorike të asgjësimit të municioneve, duke ofruar përgatitje të avancuar për situata reale.

Ky sukses i Qendrim Berishës vlerësohet si një arritje e madhe për FSK-në dhe një dëshmi e profesionalizmit dhe përgatitjes së kuadrove të saj për të përfaqësuar Kosovën me dinjitet në skenën ndërkombëtare të sigurisë dhe mbrojtjes.