Në këtë takim të Komitetit për Menaxhimin e Pandemisë është vendosur që të lehtësohen masat anti-COVID, masa këto të ndërmarra nga Qeveria e Kosovës gjatë muajit janar.

Ministri i Shëndetësisë, Rifat Latifi pas mbajtjes së këtij takimi, ka bërë të ditur se është rekomanduar lehtësimi i masave kundër COVID-19, e që pritet të miratohen sot (e premte), kurse të shtunën të hyjnë në fuqi.

I pari i MSh-së ka bërë të ditur se ora policore [kufizimi i lëvizjes] do të shkurtohet, pra me masat e reja do të fillojë nga 00:00 deri në ora 05:00, ndërkaq gastronomisë do t’i lejohet që të punojë deri në ora 23:00.

Sa i përket hyrjes në Kosovë, ata që dëshirojnë të hyjnë në vend duhet që të dëshmojnë se janë vaksinuar me dy doza të vaksinës anti-COVID, ndërsa ata që janë vaksinuar me një dozë duhet të kenë edhe testin PCR.

Po ashtu, maska pritet të hiqet në ambientet e jashtme dhe fitneset të hapen.

Ministri i Shëndetësisë, Rifat Latifi bëri thirrje që çdo veprimtari, së cilës i janë lehtësuar masat, duhet që të pranojnë vetëm ata qytetarë që kanë dy doza të vaksinës.