Rrjeti i Prindërve Edukues apelon: Ndaloni faljen e notave, rikthejeni vlerësimin e drejtë në arsim

Nëpërmjet një komunikate për media, Rrjeti i Prindërve Edukues shprehet se falja e notave, pavarësisht justifikimeve të ndryshme, po dëmton rëndë fëmijët, po ul standardet arsimore, po cenon dinjitetin e mësimdhënësve dhe po prodhon pasoja afatgjata negative për shoqërinë.

Rrjeti kërkon me ngulm:

• Vlerësim real, të drejtë dhe pa ndikime të padrejta për çdo nxënës.
• Ndaljen e presioneve për falje të notave.
• Rivendosjen e mekanizmave edukativë si përsëritja e vitit dhe ri-provimet.
• Angazhim të përgjithshëm institucional dhe shoqëror për ta rikthyer dinjitetin dhe cilësinë në sistemin arsimor.

Në apelin e tyre të plotë, të cilin e kanë bashkëngjitur, Rrjeti i Prindërve Edukues të Kosovës bën thirrje për trajtimin me seriozitet të kësaj çështjeje dhe kërkon ndihmën e të gjithëve për të nxitur ndryshime pozitive në interes të fëmijëve dhe të ardhmes së vendit.

“Ju lutemi ta trajtoni këtë apel me seriozitetin që kërkon rëndësia e kësaj çështjeje, dhe të na ndihmoni që së bashku të nxisim ndryshime pozitive në interes të fëmijëve dhe të ardhmes së vendit tonë,” thuhet në fund të komunikatës.