Rigjykimi i “53-milionëshit” nis në Prishtinë për Pal Lekajn dhe të tjerët
Në Gjykatën Themelore në Prishtinë ka nisur sot rigjykimi i rastit të njohur si “53-milionëshi” ndaj të akuzuarve Pal Lekaj, Eset Berisha, Nebih Shatri dhe Besim Tahiri. Ata akuzohen për keqpërdorim të detyrës zyrtare në lidhje me autostradën “Arbën Xhaferi”.
Pal Lekaj, në kohën kur mbante pozitën e ministrit të Ministrisë së Infrastrukturës (MI), Eset Berisha, si këshilltar i tij politik, Nebih Shatri, në rolin e sekretarit të Përgjithshëm në MI, dhe Besim Tahiri, si drejtor i Prokurimit Publik në MI, ngarkohen nga Prokuroria për keqpërdorim të detyrës zyrtare në bashkëkryerje, raporton “Betimi për Drejtësi”.
Në seancën e sotme ishin të pranishëm Lekaj me avokatët e tij Artan Qerkini, Musa Damati dhe Kaltrina Kodraliu, Tahiri me avokatin Ardit Humolli, Shatri me avokatin Driton Musliu dhe Berisha me avokaten Teuta Xhema. I pranishëm ishte edhe prokurori special, Atdhe Dema.
Më 31 janar 2024, Gjykata Themelore në Prishtinë i kishte shpallur fajtorë dhe i kishte dënuar të katërt të akuzuarit me një total prej 10 vjet e 3 muaj burgim. Sipas aktgjykimit të Themelores, Pal Lekaj u dënua me 3 vite e 8 muaj burgim efektiv dhe iu ndalua ushtrimi i funksionit publik për 3 vite e 6 muaj. Nebih Shatri dhe Besim Tahiri u dënuan secili me 1 vit e 8 muaj burgim dhe me ndalim të ushtrimit të funksionit publik për 2 vite. Eset Berisha u dënua me 3 vite e 3 muaj burgim dhe me ndalim të ushtrimit të funksionit publik për 3 vite.
Megjithatë, Gjykata e Apelit e ka kthyer rastin në rigjykim për të katërt të akuzuarit.
“Betimi për Drejtësi” ka raportuar më parë detaje nga vendimi i plotë i Themelores, duke përfshirë gjetjet e gjykatës nga mbrojtja e të akuzuarve dhe dëshmitë e dëshmitarëve, si dhe arsyetimin e Apelit për kthimin në rigjykim.
Sipas aktakuzës së Prokurorisë Speciale të datës 4 shkurt 2022, të akuzuarit ngarkohen për keqpërdorim të detyrës zyrtare lidhur me ndarjen e 53 milionë eurove për konsorciumin “Bechtel & Enka” për ndërtimin e autostradës Prishtinë – Hani i Elezit, e njohur si autostrada “Arbën Xhaferi”.