Reshjet e shiut – paralajmërohen vërshime në zonën e Dukagjinit

Instituti Hidrometeorologjik i Kosovës (IHMK) përmes një njoftimi për media, ka paralajmëruar se pritet të ketë vërshime në disa komuna në zonën e Dukagjinit, si rezultat i reshjeve që pritet të bien gjatë kësaj jave.

Po ashtu, nga IHMK-ja kanë njoftuar se reshjet mund të ndodhin nga pasditja e sotme e deri më 27 shtator.

Komunat më të rrezikuara nga vërshimet do të jenë Gjakova, Juniku, Deçani, Peja, Klina, Malisheva dhe Rahoveci.

Ndërkaq, nga IHMK-ja kanë njoftuar se pastaj pjesa qendrore dhe verilindore e vendit, mund të krijohen vërshime të shpejta, të cilët mund të shkaktojnë vështirësi dhe probleme, si në rrëshqitje të dheut, mbyllje të sistemit të kanalizimeve dhe vështirësi në qarkullim.

Këtë situatë mund ta vështirësojnë edhe reshjet nga java e kaluar, të cilat kishin shkaktuar përmbytje në disa komuna, tokat e rrafshëta të të cilave tani duket se janë të tejngopura me ujë dhe është limituar kapaciteti i tyre thithës gjegjësisht lagështia e tokës në shtresën sipërfaqësore.

Sqarim:

Reshjet më të larta se 30 l/m² në 12 orë NDIKIM NË: Shkaktim përmbytjesh, probleme në të gjitha aktivitetet e prodhimit bujqësor, probleme në trafik, rrezik për rrëshqitje dheu. Lëndime të mundshme të njerëzve dhe dëmtim të pronës. Shfaqje lokale të shtrëngatave me ose pa reshje NDIKIMI: Rreziku i goditjes nga rrufeja, rreziku për jetën e njerëzve dhe kafshëve, probleme në funksionimin e të gjitha pajisjeve që përdorin energjinë elektrike, rreziku i ndezjes së zjarrit, probleme në telekomunikacion. probleme të mundshme në transmetimin e energjisë elektrike nga goditjet e rrufesë. Është e mundur dukuri lokale e shirave intensivë, përrenjve dhe erërave të forta me dëmtime të pasurive të luajtshme dhe të paluajtshme.