OVL e UÇK-së: Mos i përdorni simbolet e luftës për interesa politike
Organizata e Veteranëve të Luftës së UÇK-së ka reaguar ndaj përdorimit të simboleve të Ushtrisë Çlirimtare të Kosovës gjatë protestës disaditore që po mbahet në Tiranë, duke kërkuar që ato të mos shfrytëzohen për qëllime politike.
Foto: Ilustrim
Përmes një reagimi publik të shpërndarë nga Hysni Gucati, OVL e UÇK-së ka shprehur shqetësimin për atë që e cilëson si përpjekje të vazhdueshme për manipulim politik dhe instrumentalizim të emrit dhe simboleve të UÇK-së.
Në reagim thuhet se është e papranueshme që individë apo grupe të caktuara të flasin në emër të UÇK-së, ndërsa sipas veteranëve, në të kaluarën kanë tentuar të minimizojnë ose deformojnë vlerat e luftës çlirimtare.
OVL e UÇK-së thekson se kauza e saj nuk duhet të shërbejë si mjet për agjenda politike, interesa personale apo partiake, duke rikujtuar se lufta çlirimtare përfaqëson sakrificën dhe përpjekjen për liri të popullit shqiptar.
Po ashtu, organizata u ka bërë thirrje organizatorëve të protestës në Tiranë që të ruajnë integritetin e aktivitetit dhe të mos lejojnë, siç thuhet në reagim, keqpërdorimin e emrit të veteranëve apo paraqitje të rreme në emër të ish-pjesëtarëve të UÇK-së.
Sipas OVL-së, UÇK-ja mbetet një pjesë e rëndësishme e historisë së lirisë së Kosovës dhe duhet të trajtohet me respekt e dinjitet, larg përfitimeve politike të momentit.
