Oda Amerikane i bën thirrje Qeverisë së Kosovës të heqë tarifat doganore për mallrat nga SHBA-ja
Oda Ekonomike Amerikane në Kosovë (OEAK) ka kërkuar nga Qeveria e Kosovës që të tërheqë tarifën doganore prej 10 për qind për mallrat nga Shtetet e Bashkuara të Amerikës. Kjo thirrje vjen në një kohë kur vendimi i presidentit amerikan, Donald Trump, për vendosjen e tarifave doganore bazë prej 10 për qind ka ngjallur shqetësime në komunitetin e biznesit kosovar.
Kryetari i OEAK-ut, Arian Zeka, ka paralajmëruar se tarifat e vendosura nga SHBA-ja do të ndikojnë negativisht në aftësinë e eksportuesve kosovarë dhe do të ulin konkurrencën e produkteve të Kosovës në tregun amerikan. Ai ka theksuar rëndësinë e një veprimi të njëanshëm nga Kosova, duke hequr tarifat doganore për produktet amerikane, në mënyrë që të inkurajojë administratën amerikane të ndërmarrë të njëjtin hap.
“Po që se Kosova lëviz përpara në mënyrë të njëanshme me ndërmarrjen e një mase preferenciale tregtare, duke tërhequr në tërësi tarifën doganore për produktet amerikane, mund të shpresojmë që i njëjti hap do të pasohet dhe do të hiqet nga administrata amerikane,” tha Zeka për Radion Evropa e Lirë.
Ndërkohë, Dhoma e Tregtisë dhe Industrisë në Kosovë ka shprehur shqetësimin e saj për vendimin e presidentit amerikan, duke theksuar se kjo do të godasë edhe më shumë eksportin kosovar drejt SHBA-së, i cili ka shënuar rënie në muajt e fundit. Kjo dhomë i ka bërë thirrje Qeverisë së Kosovës që të ofrojë mbështetje për bizneset e prekura nga kjo situatë.
Të dhënat nga Dogana e Kosovës tregojnë një rritje të konsiderueshme të eksporteve kosovare në SHBA nga viti 2019, duke arritur në mbi 131 milionë euro në vitin 2022, nga 3 milionë euro në vitin 2019. Produktet e eksportuara përfshijnë ushqime, lëngje, tekstil, dyshekë, si dhe prodhime nga druri dhe plastika.
Përveç tarifës bazë, presidenti Trump ka vendosur tarifa më të larta për dhjetëra vende që kanë suficit tregtar me SHBA-në, duke rritur rrezikun për një luftë tregtare dhe rritje të inflacionit.
Radio Evropa e Lirë ka pyetur Zyrën e kryeministrit të Kosovës dhe Ministrinë e Industrisë, Ndërmarrësisë dhe Tregtisë në lidhje me kërkesën e OEAK-ut, por deri më tani nuk ka marrë përgjigje.
