Nga kush blejmë energji? – Hykmete Bajrami kërkon përgjigje të qarta nga qeveria
Nënkryetarja e Lidhjes Demokratike të Kosovës (LDK), Hykmete Bajrami, ka akuzuar Qeverinë e Kosovës dhe Ministrinë e Ekonomisë për keqpërdorime milionëshe në sektorin e energjisë.
Ajo u shpreh gjatë një konference për media se qytetarët kanë të drejtë të dinë detaje të plota mbi importet e energjisë dhe kërkoi transparencë të plotë nga institucionet përkatëse.
“Rizvanolli tha se EFT nuk ka asnjë kontratë me Kosovën, por ajo nuk po tregon se me kë ka kontrata. Nga këtu bëjmë thirrje Rizvanollit dhe institucioneve që t’i publikojnë kontratat, që të dimë se nga kush po blejmë energji, sa po blejmë energji, ku është origjina e energjisë që ne po importojmë dhe sa po paguan Kosova për kostot e transportit. Po kërkojmë që të publikohen kontratat”, tha Bajrami, duke theksuar rëndësinë e transparencës për parandalimin e keqpërdorimeve dhe mbrojtjen e interesit publik.
Bajrami theksoi se qytetarët dhe bizneset e Kosovës meritojnë informacion të qartë mbi procedurat dhe çmimet e importit të energjisë, duke shtuar se çdo kontratë e fshehur mund të krijojë hapësirë për abuzime dhe shpenzime të pajustifikuara.
Ajo u bëri thirrje institucioneve të publikojnë menjëherë të gjitha kontratat dhe raportet financiare lidhur me importet e energjisë, në mënyrë që të garantohet llogaridhënia dhe besimi i qytetarëve.
