Nesër mund të shpallen rezultatet përfundimtare të zgjedhjeve të 17 tetorit

Kështu ka bërë të ditur në një konferencë për media zëdhënësi i Komisionit Qendror të Zgjedhjeve (KQZ), Valmir Elezi.

Po ashtu, ai ka bërë të ditur se numri i përgjithshëm i fletëvotimeve që do të numërohen është 15 mijë e 482, ku 12 mijë e 960 fletëvotime janë me kusht dhe 2 mijë e 522 fletëvotime janë të personave me nevoja të veçanta.

“Numri përgjithshëm i fletëvotimeve që do të numërohen është 15 mijë e 482, prej të cilave numri i zarfeve me fletëvotime me kusht është 12 mijë e 960, ndërsa 2 mijë e 522 të tjera u takojnë personave me nevoja të veçanta të cilët kanë votuar përmes ekipeve mobile,” ka thënë zëdhënësi i KQZ-së.

Gjithashtu, Elezi në këtë konferencë për media ka thënë se nëse gjithçka shkon sipas planifikimeve, atëherë Komisioni Qendror i Zgjedhjeve (KQZ) të mërkurë do të bëjë shpalljen e rezultateve përfundimtare të raundit të parë të zgjedhjeve lokale, të cilat u mbajtën të dielën e 17 tetorit.

“Numërimi i këtyre votave i hap rrugë KQZ-së për të shpallur rezultatet përfundimtare të Zgjedhjeve për Kryetarë të Komunave.

Natyrisht se kjo është e ndërlidhur me ecurinë e punëve këtu në QNR, prandaj nëse gjithçka përmbyllet sipas planit, atëherë KQZ-ja do të mundet që gjatë ditës së mërkurë 27 tetor, të shpall rezultatet përfundimtare të raundit të parë të Zgjedhjeve Lokale për Kryetarë të Komunave,” tha Elezi në konferencën për media.