Murati kalkulon ndihmat e Qeverisë për prindërit e punësuar në sektorin publik

Ministri i Financave, Punës dhe Transfereve, Hekuran Murati, ka bërë të premten një përllogaritje nga masat mbështetëse që ka ofruar Qeveria e Kosovës.

Sipas Muratit, nga ndihmat një çift profesionistësh, që punon në sektorin publik dhe që ka tre fëmijë, ka përfituar në total 3 mijë e 220 euro mbështetje financiare.

Ai ka thënë se nëse llogaritet edhe ndihma që prindërit marrin pas lindjes së bebes së re, mbështetja shkon në 3 mijë e 970 euro.

Këtë postim Murati e bëri disa orë pasi kryetari i LDK-së, Lumir Abdixhiku, njoftoi se ka vizituar një familje që burim të ardhurash kanë pagat nga sektori publik.

Abdixhiku tha se pagat e tyre sot vlejnë 50 për qind më pak se para dy viteve.

Shkrimi i plotë i Hekuran Muratit:

Një çift profesionistësh që punojnë në sektorin e shëndetit publik, që kanë 3 fëmijë, dhe janë në pritje të fëmiut të katërt, vetëm nga masat e Pakos së Ringjalljes Ekonomike, apo Pakos për Përballje me Inflacionin, kanë mundur të përfitojnë si në vijim:

Masa 3.5 – shtesa për lehona dhe fëmijë

Për 3 fëmijë i bie:

3 x 12 muaj x 10 euro, apo total

360 euro/vit shtesa për fëmijë

Masa 3.6 – shtesat për likuiditet familjar

Pakoja e prillit – 100 euro për të gjithë të punësuarit e sektorit publik që kanë pagën më pak se 1,000 euro, që për dy të punësuar i bie:

2 x 100, apo total

200 euro

Pakoja për Përballje me Inflacion – 50 euro/muaj për periudhën shtator 2022 – janar 2023, që për dy të punësuar i bie:

2 x 5 muaj x 50 euro, apo total

500 euro

Masa 4.1 – shtesa për pandeminë

10% e pagës (min. 60 euro) çdo muaj nga muaji gusht 2021 deri në janar 2023, që për dy të punësuar i bie:

2 x 18 muaj x 60 euro, apo total

2,160 euro shtesa për pandemi

Pra potencialisht, TOTAL prej 3,220 euro mbështetje direkte financiare për një familje të tillë.

Shto këtu edhe mbështetjen që pritet pas lindjes së bebes së re, ku nëna e punësuar përfiton 3 muaj nga 170 euro apo total 510 euro, ndërsa për beben shtesat jane 240 euro/vit.

Pra edhe 750 euro tjera, për ta ngritur totalin e mbështetjes në 3,970 euro.

Dhe kjo mbështetje enorme është pa llogaritur subvencionimin e përballueshmërisë së tarifave në vlerë prej 100 milionë euro, apo subvencionimin për kursim të energjisë elektrike, që e përfitojnë mbi 200 mijë famijle.

Kjo është Qeveria Kurti, Qeveria për të gjithë!

Kurse plani i opozitës është të ulet TVSH-ja në naftë.