Një tjetër aksident fatal në autostradën A3 në Kroaci: Katër të vdekur në dy aksidente në 24 orët e fundit
Një ditë e rëndë me dy tragjedi të ndara ka ndodhur të enjten në autostradën A3 pranë Novskës, në Kroaci, ku gjithsej katër persona kanë humbur jetën.
Foto: Ilustrim
Sipas raportimeve nga mediat lokale, rasti i fundit ndodhi rreth orës 21:20 të mbrëmjes, kur dy burra u përplasën për vdekje nga një veturë ndërsa po tentonin të kalonin rrugën me vrap. Policia e Qarkut Sisak-Moslavina bëri të ditur se viktimat ndërruan jetë në vendngjarje si pasojë e plagëve të rënda, ndërsa trupat e tyre janë dërguar në spitalin e Sisakut për autopsi.
Kjo tragjedi ndodhi vetëm disa orë pasi një aksident tjetër i rëndë kishte tronditur të njëjtën zonë të autostradës. Rreth orës 10:00 të mëngjesit, në segmentin midis Okuçanit dhe Novskës, një aksident zinxhir u mori jetën dy personave të tjerë dhe shkaktoi plagosjen e disa të tjerëve.
Për shkak të këtyre ngjarjeve, qarkullimi në atë pjesë të autostradës u ndërpre për një periudhë të gjatë kohe, konfirmoi policia kroate.
Autoritetet janë duke hetuar rrethanat e plota të të dy aksidenteve tragjike.
