Lajm i mirë për mërgatën – Sveçla bisedon me homologun kroat për të lehtësuar kalimin në kufij
Ardhja e bashkatdhetarëve në vendlindje ka sjellë angazhimin e Ministrisë së Punëve të Brendshme të Kosovës për të evituar pritjet e gjata në pikat kufitare.
Foto: Ilustrim
Ministri i Punëve të Brendshme, Xhelal Sveçla, ka njoftuar se pas informatave të pranuara për vonesat që po hasin qytetarët tanë gjatë rrugëtimit të tyre, ka zhvilluar një bisedë me homologun e tij kroat, z. Davor Božinović.
Fokusi i kësaj bisede ishte gjetja e modaliteteve për një kalim sa më të lehtë dhe të shpejtë nëpër territorin e Kroacisë. Sipas informacioneve të siguruara nga SuharekaOnline, ministri Sveçla i ka kërkuar konkretisht homologut kroat që, brenda mundësive teknike, të shtohet numri i kabinave punuese në pikat kufitare. Kjo kërkesë synon që të rritet kapaciteti i kontrollit dhe të shkurtohet koha e pritjes për kolonat e gjata të automjeteve.
Nga ana e tij, ministri Božinović ka shprehur gatishmërinë e plotë për të adresuar këtë kërkesë brenda rregullave dhe procedurave në fuqi. Sveçla ka falënderuar ministrin kroat për vullnetin e treguar dhe për bashkëpunimin e shkëlqyer që dy ministritë kanë pasur deri më tani në fusha të ndryshme.
Në fund të njoftimit të tij, ministri Sveçla u ka drejtuar një mesazh të gjithë pjesëtarëve të diasporës, duke u uruar rrugë të mbarë dhe mirëseardhje në atdhe. Ky koordinim ndërshtetëror pritet të ndikojë pozitivisht në qarkullimin e bashkatdhetarëve që vijnë nga vendet e Evropës Perëndimore përmes Kroacisë.
Përndryshe, ky është një nga rastet e rralla ku një ministër i Republikës së Kosovës kërkon nga një homolog i tij që qytetarët e vendit të tij t’u nënshtrohen procedurave të shpejta administrative në pikat kufitare.
