Zvicër, arrestohet 18-vjeçari kosovar: Kapet “duke fluturuar” me mbi 100 km/h në zonën 50
Një 18-vjeçar kosovar është ndaluar nga policia kantonale e Cyrihut gjatë fundjavës, pasi u kap duke drejtuar mjetin me shpejtësi të tejskajshme në rrugën Mythenquai, në drejtim të Kilchberg.
Foto: Ilustrim
I riu po udhëtonte me mbi 100 km/h në një zonë ku kufiri i lejuar ishte vetëm 50 km/h.
Ai ra në sy të autoriteteve pas një parakalimi të rrezikshëm – pikërisht mbi një automjet civil të policisë kantonale. Pas ndalimit, policia konfirmoi se e arrestoi menjëherë shoferin dhe e dorëzoi në prokurorinë publike.
Veç kësaj, të riut iu konfiskua menjëherë leja e drejtimit, të cilën e kishte marrë vetëm tre muaj më parë.
Rasti po trajtohet si shkelje e rëndë e ligjeve të komunikacionit rrugor në Zvicër dhe pritet që ndaj tij të ndërmerren masa të mëtejshme ligjore.
