Zvicër, 31-vjeçari shqiptar arrestohet në flagrancë gjatë vjedhjes në një apartament, bashkëpunëtori arratiset
Një vjedhje me thyerje është raportuar të shtunën në mbrëmje në qytetin Zug të Zvicrës. Rreth orës 19:30, Policia e Zugut ka marrë një njoftim se persona të paautorizuar ndodheshin brenda një apartamenti në një pallat në rrugën Lüssirainstrasse.
Foto: Ilustrim
Patrullat policore ndërhynë menjëherë dhe rrethuan ndërtesën. Gjatë kontrollit të apartamentit, policia arriti të arrestonte një burrë që fshihej pas një divani. I arrestuari është një 31-vjeçar me prejardhje shqiptare.
Në momentin e arrestimit, ai kishte me vete disa qindra franga në para të gatshme, në valuta të ndryshme, si dhe një sasi të konsiderueshme bizhuterish, të cilat dyshohet se u morën nga apartamenti.
Sipas hetimeve fillestare, 31-vjeçari ka vepruar së bashku me një person tjetër. Të dy dyshohet se janë ngjitur në ballkon dhe kanë hyrë në apartament përmes derës së ballkonit. Megjithatë, bashkëpunëtori i tij arriti të ikë me këmbë në momentin kur mbërriti policia, dhe pavarësisht një operacioni të menjëhershëm kërkimi, nuk u gjet.
Prokuroria Publike e Kantonit të Zugut ka hapur një procedurë penale ndaj 31-vjeçarit të arrestuar. Me kërkesë të saj, Gjykata e Masave Shtrënguese ka urdhëruar paraburgimin e tij.
Ndërkohë, hetimet për identifikimin dhe arrestimin e autorit të dytë janë ende në zhvillim.
