Regjistrimi nga Diaspora, Suhareka në top-listë, më shumë votues të regjistruar se Prizreni dhe Peja
Komisioni Qendror i Zgjedhjeve (KQZ) ka publikuar të dhënat e reja mbi regjistrimin e votuesve nga diaspora, duke treguar një angazhim të lartë të qytetarëve kosovarë jashtë vendit për të marrë pjesë në Zgjedhjet Lokale.
Të dhënat tregojnë se deri më 22 gusht, janë aprovuar 13,360 aplikime për votim me postë, me 3,542 të refuzuara nga një total prej 16,902 aplikimesh.
Në mesin e komunave me numrin më të lartë të votuesve të regjistruar nga diaspora, Suhareka renditet në pozicionin e katërt. Me 1,021 votues të regjistruar, Suhareka lë pas vete Prizrenin (736), Pejën (602), si dhe shumë komuna të tjera të mëdha. Kjo shifër dëshmon një lidhje të fortë dhe një interes të veçantë të diasporës suharekase për zhvillimet politike në komunën e tyre.
Komuna e Gjakovës kryeson listën me 1,065 votues të regjistruar, e pasuar nga Dragashi me 1,033 dhe Prishtina me 1,021 votues. Pozicioni i lartë i Suharekës, duke e tejkaluar edhe Prishtinën në numrin e votuesve të regjistruar deri më tani, është një tregues i një komuniteti të bashkuar që dëshiron të ushtrojë të drejtën e tij për të votuar.
Në total, deri më 22 gusht 2025, KQZ ka pranuar 16,902 aplikime, prej të cilave 13,360 janë aprovuar. Procesi i regjistrimit, që filloi më 23 korrik, do të vazhdojë deri më 29 gusht 2025. Votuesit jashtë Kosovës kanë mundësinë të regjistrohen përmes platformës elektronike https://diaspora.kqz-ks.org ose përmes postës.
Për sa i përket vendeve ku janë regjistruar votuesit, Gjermania kryeson bindshëm me 6,558 votues, e pasuar nga Zvicra (3,100), Austria (692) dhe Italia (543). Ky trend tregon një prani të madhe të komuniteteve shqiptare në këto vende, të cilët janë duke shfrytëzuar mundësinë për të ndikuar në zgjedhjet lokale në Kosovë.