Konjufca pret delegacionin evropian: Kosova synon zgjedhje demokratike dhe anëtarësim në Këshillin e Evropës
Kryetari i Kuvendit të Kosovës, Glauk Konjufca, ka pritur në një takim delegacionin e Asamblesë Parlamentare të Këshillit të Evropës, të kryesuar nga Petra Bayr.
Foto: Ilustrim
Sipas njoftimit të Kuvendit, gjatë takimit u diskutua për ligjin e zgjedhjeve dhe rëndësinë e ruajtjes së traditës demokratike të Kosovës. Konjufca theksoi pritshmëritë që proceset zgjedhore në vend të vijojnë të jenë shembull për zhvillimin demokratik, duke nënvizuar se Kosova aspiron të bëhet pjesë e strukturave ndërkombëtare.
“Kryekuvendari Konjufca ritheksoi se Republika e Kosovës mbetet e përkushtuar për t’u anëtarësuar në Këshillin e Evropës, ashtu siç ka qenë dhe vijon të mbetet e angazhuar në ruajtjen dhe zhvillimin e mëtejshëm të demokracisë, mbrojtjen e të drejtave të njeriut dhe fuqizimin e sundimit të ligjit”, thuhet në njoftim.
Në përfundim të takimit, Konjufca falënderoi delegacionin për diskutimet e frytshme dhe uroi një qëndrim të këndshëm në Kosovë.
