Kurti së bashku me Zybën e Durmishin shpalosën prioritetet e qeverisë në fshatin Mushtisht, Samadrexhë dhe Studençan

Të dielën të gjithë qytetarët me të drejtë vote do ta kenë mundësinë t’u drejtohen kutive të votimit, që të votojnë të përzgjedhurit e tyre.

Tashmë ndodhemi në ditët e fushatës zgjedhore për zgjedhjet e parakohshme parlamentare që do të mbahen më 14 shkurt.

Në vazhdën e aktiviteteve në këtë fushatë 10-ditëshe, kandidati për kryeministër nga Lëvizja Vetëvendosje, Albin Kurti, kandidatja për presidente, Vjosa Osmani dje kanë qëndruar në Suharekë.

Në këtë tubim Kurti gjatë një fjalimi ka përshendetur qytetarët e Suharekës dhe ka thënë se të dielën e 14 shkurtit ta bëjmë fitoren me F të madhe me mbi 61 deputetë, e ta çlirojmë Kosovën nga korrupsioni.

Po ashtu Kurti e Osmani së bashku me kandidatët për deputetë nga Suhareka, Salih Zybën e Hysen Durmishin njëashtu edhe me kandidatët e tjerë Albana Gashi, Haxhi Avdyli, e Drita Millaku vizituan edhe fshatin Mushtisht, Samadrexhë dhe Studençan.

Përgjatë këtyre vizitave në fshatrat e lartëcekur Kurti së bashku me strukturën e LVV-së shpalosën prioritetet e qeverisë së re.

“Fitorja jonë po vërehet në çdo qytet, fshat, lagje e çdo familje dhe vetëm pak ditë na ndajnë nga Referendumi i 14 shkurtit”, ka shkruar Lëvizja Vetëvendosje – Dega Suharekë në Facebook.

Kujtojmë se Lëvizja Vetëvendosje në zgjedhjet e 14 shkurtit garon me numrin #127 ndërsa kandidatët për deputetë nga Suhareka, Salih Zyba në listën e kandidatëve mban numrin #110 dhe Hysen Durmishi numrin #50.