Prizren, arrestohet pasagjeri i një veture pasiqë hapi derën dhe lëndoi rëndë një person që po lëvizte me trotinet

26.07.2025

Një aksident i pazakontë trafiku ka ndodhur të premten në rrugën “Zahir Pajaziti” në Prizren, ku një person ka pësuar lëndime të rënda trupore.

Sipas Policisë së Kosovës, rreth orës 12:46, viktima – një mashkull kosovar – ishte duke lëvizur me trotinet kur është përplasur me derën e një veture të ndalur. Dera ishte hapur në atë moment nga një pasagjer që ndodhej brenda veturës, i cili u identifikua më pas si i dyshuar për shkaktimin e aksidentit.

Përplasja ka rezultuar me lëndime serioze për vozitësin e trotinës, i cili është dërguar menjëherë për trajtim mjekësor në Qendrën Klinike Universitare të Kosovës (QKUK) në Prishtinë.

Pas intervenimit të njësive të policisë, me urdhër të prokurorit, pasagjeri që hapi derën është arrestuar dhe dërguar në mbajtje.

“Rr. Zahir Pajaziti, Prizren 25.07.2025 – 12:46. Një person mashkull kosovar, ka pësuar lëndime të rënda trupore derisa ishte duke lëvizur me trotinet dhe është ndeshur në derën e një veture që ishte e ndalur, të cilën e kishte hapur i dyshuari mashkull kosovar, që ishte pasagjer në veturë. Viktima është dërguar për trajtim mjekësor në QKUK, ndërsa i dyshuari me vendim të prokurorit është arrestuar dhe dërguar në mbajtje”, thuhet në njoftimin zyrtar të Policisë së Kosovës.

Rasti është në hetim.