Standardi zviceran i mbrojtjes së të dhënave, pranohet nga BE-ja

Komisioni Evropian e ka klasifikuar mbrojtjen zvicerane të të dhënave si ekuivalente me Rregulloren e Përgjithshme të BE-së për Mbrojtjen e të Dhënave (GDPR).

Përveç Zvicrës, dhjetë vende të tjera jashtë BE-së morën dritën e gjelbër për kontrollet e tyre për mbrojtjen e të dhënave.

“Gjatë shqyrtimit të ekuivalencës së mbrojtjes së të dhënave, u arrit në përfundimin se të dhënat personale të transferuara nga BE-ja në Zvicër vazhdojnë t’u nënshtrohen garancive të duhura të mbrojtjes së të dhënave”, shkroi KE në një deklaratë.

Përveç Zvicrës, vendim pozitiv kanë marrë edhe Andorra, Argjentina, Kanadaja, Ishujt Faroe, Guernsey, Isle of Man, Izraeli, Jersey, Zelanda e Re dhe Uruguai. Në të gjitha këto vende dhe zona, të dhënat mund të vazhdojnë të rrjedhin “të papenguar”, tha Brukseli, shkruan swissinfo.

KE në fakt donte të vendoste shumë më herët për ekuivalencën e mbrojtjes së të dhënave në Zvicër dhe vende të tjera të treta. Arsyeja për këtë është Rregullorja e re e Përgjithshme për Mbrojtjen e të Dhënave, e cila ka hyrë në fuqi që nga maji 2016 dhe, pas një periudhe tranzicioni, është e vlefshme në të gjitha shtetet e BE-së që nga maji 2018.

Fakti që iu desh kaq shumë kohë BE-së për të njohur ekuivalencën nuk ka të bëjë fare me marrëdhëniet midis Zvicrës dhe BE-së, por me avokatin austriak dhe aktivistin për mbrojtjen e të dhënave, Max Schrems. Ai kishte bërë një sfidë në Gjykatën e Drejtësisë së BE-së (ECJ) kundër marrëveshjeve për mbrojtjen e të dhënave midis BE-së dhe Shteteve të Bashkuara.

Autoriteti i Brukselit fillimisht donte të priste vendimet e GJED-së përpara se të vendoste për ekuivalencën e mbrojtjes së të dhënave në vendet e tjera. Kjo ndodhi në verën e vitit 2023, kështu që rruga ishte tashmë e qartë.