IKShPK jep këshilla për mbrojtje nga rrezet ultravjollcë – Mbi 1.5 milion raste të kancerit të lëkurës në vit

Rrezatimi UV, i cili vjen kryesisht nga dielli, është një ndër faktorët më të rrezikshëm për lëkurën, veçanërisht gjatë muajve të verës kur ekspozimi është më i madh. Edhe pse dielli është burim i rëndësishëm i vitaminës D dhe i ndihmon trupit në shumë procese biologjike, ekspozimi i tepruar dhe i pambrojtur ndaj tij rrit ndjeshëm rrezikun për zhvillimin e kancerit të lëkurës dhe dëme të tjera afatgjata.

Masat mbrojtëse që rekomandohen nga IKShPK:

Kërkoni hije, veçanërisht gjatë orëve më të nxehta të ditës (11:00 – 16:00), kur intensiteti i rrezatimit UV është më i larti.
Vishni rroba mbrojtëse: përdorni bluza me mëngë të gjata, pantallona të lehta por që mbulojnë lëkurën, si dhe materiale që bllokojnë depërtimin e rrezeve UV.
Përdorni aksesorë mbrojtës: mbani kapelë me strehë të gjerë dhe syze dielli me mbrojtje UV, për të mbrojtur fytyrën dhe sytë nga rrezet e dëmshme.
Aplikoni krem kundër diellit (SPF 30+ ose më i lartë) në të gjitha pjesët e trupit që janë të ekspozuara. Riaplikojeni çdo dy orë, ose më shpesh nëse notoni apo djersiteni shumë.

Kujdes i veçantë për fëmijët dhe të moshuarit

Grupmoshat më të ndjeshme ndaj rrezatimit UV janë fëmijët dhe të moshuarit. Lëkura e tyre është më e ndjeshme dhe më e prirur ndaj djegieve dhe dëmtimeve të përhershme. Prandaj, kujdesi për mbrojtjen e tyre duhet të jetë prioritet.

IKShPK apelon për vetëdijesim të shtuar të qytetarëve, veçanërisht në sezonin e verës, kur qëndrimi i gjatë në plazh apo aktivitete në natyrë janë më të zakonshme. Mbrojtja ndaj diellit nuk është thjesht çështje estetike, por një masë thelbësore për ruajtjen e shëndetit dhe parandalimin e sëmundjeve serioze, përfshirë kancerin e lëkurës.

Zbatimi i këtyre masave është i thjeshtë, por mund të shpëtojë jetë. Kujdesuni për veten – lëkura juaj do t’ju falënderojë!