IKSHPK del informata për parandalimin dhe kujdesin e Metapneumovirusit Njerëzor (hMPV)

Instituti Kombëtar i Shëndetësisë Publike të Kosovës (IKSHPK), në bashkëpunim me Zyrën e OBSH-së në Kosovë, ka ndarë informata të rëndësishme për qytetarët, duke synuar rritjen e ndërgjegjësimit dhe masave parandaluese.

Çfarë është hMPV dhe si përhapet?

Metapneumovirusi njerëzor (hMPV) është një virus i zakonshëm respirator, i zbuluar për herë të parë në vitin 2001 nga shkencëtarët holandezë. Ky virus ndjek një model sezonal, duke arritur kulmin në dimër ose në fillim të pranverës. Ai përhapet përmes:

• Pikave gjatë kollitjes dhe teshtitjes.
• Kontaktit të ngushtë personal, si puthja, prekja ose shtrëngimi i duarve.
• Prekjes së objekteve të kontaminuara dhe më pas prekjes së gojës, hundës ose syve.

Simptomat e hMPV

Simptomat më të zakonshme përfshijnë:

• Kollë.
• Ethe.
• Kongjestion nazal.
• Fishkëllimë në frymëmarrje.

Shumica e rasteve janë të lehta dhe ngjajnë me të ftohtin e zakonshëm. Megjithatë, për personat e ndjeshëm, si fëmijët e vegjël, të moshuarit dhe ata me imunitet të dobësuar, virusi mund të shkaktojë bronkit ose pneumoni.

Kush është në rrezik?

Grupet më të rrezikuara për komplikime serioze janë:

• Foshnjat dhe fëmijët e vegjël.
• Personat me imunitet të kompromentuar.
• Të moshuarit.
• Personat me sëmundje kronike të mushkërive, si astma ose COPD.

Masat për parandalim

IKSHPK rekomandon masa të thjeshta për të parandaluar përhapjen e hMPV dhe infeksioneve respiratore:

• Qëndroni në shtëpi kur jeni të sëmurë.
• Mbani maska në ambiente të mbushura ose me ajrosje të dobët.
• Lani duart rregullisht me ujë dhe sapun.
• Mbuloni kollën dhe teshtitjen me pecetë ose bërryl.
• Shmangni prekjen e fytyrës me duar të palara.
• Konsultohuni me mjekun për marrjen e vaksinave të rekomanduara kundër gripit sezonal.

Trajtimi dhe kujdesi

Aktualisht, nuk ka trajtim specifik ose vaksinë për hMPV. Kujdesi shëndetësor është kryesisht simptomatik, dhe në shumicën e rasteve, virusi kalon vetë. Për lehtësimin e simptomave, mjekët mund të rekomandojnë barna pa recetë ose, në raste të rënda, inhalatorë përfishkëllimën dhe kollën.

IKSHPK inkurajon qytetarët të ndjekin këto masa për të mbrojtur shëndetin e tyre dhe të komunitetit, veçanërisht gjatë sezonit të dimrit kur rreziku i infeksioneve respiratore është më i lartë.