Përleshja në stacionin e autobusëve në Suharekë, Sylaj: Në shtëpitë e dy personave u gjetën armë

Sipas raportimeve të policisë, gjatë kësaj përleshjeje është përdorur edhe një boks i hekurit, duke rrezikuar seriozisht jetën e të tjerëve.

Policia e Kosovës, e njoftuar për këtë rast, ka reaguar menjëherë duke dalë në vendin e ngjarjes. Gjatë kontrollit të zonës, forcat e rendit kanë gjetur tre fishekë dhe një bokës të hekurit.

Lidhur me rastin policia ka vazhduar hetimet e mëtejshme ku në dy lokacione ka gjetur armë dhe municion.

I kontaktuar nga SuharekaOnline komandanti i Stacionit Policor në Suharekë, kapiten Afrim Sylaj, ka bërë të ditur se gjatë hetimeve në telefonat e dy të miturve janë gjetur fotografi me armë.

Pas realizimit të urdhëresës së prokurorit në dy lokacione Duhël dhe Vraniq janë gjetur dhe sekuestruar armë dhe municion, ka shtuar Sylaj.

Në fshatin Vraniq rreth orës 15:15 është shoqëruar në stacionin policor i dyshuari mashkull kosovar, pasi që gjatë kontrollit në shtëpisë së tij  është gjetur dhe sekuestruar një pushkë gjuetie dhe 41 fishekë.

Gjithashtu në fshatin Duhël rreth orës 15:25 është shoqëruar në stacionin policor i dyshuari mashkull kosovar, pasi që gjatë kontrollit në shtëpisë së tij  është gjetur dhe sekuestruar një pushkë gjuetie.

Në të dyja rastet me vendim të prokurorit, të dyshuarit janë liruar dhe rasti shkon në procedurë të rregullt.

Komandanti, Afrim Sylaj, ka bërë të ditur se Policia e Kosovës deklaron zero tolerancë ndaj çdo forme të armëmbajtjes së paligjshme dhe do të ndërmarrë të gjitha masat e nevojshme për të zbuluar dhe sekuestruar armët e paligjshme. Policia i bën thirrje qytetarëve të denoncojnë çdo rast të armëmbajtjes së paligjshme, duke siguruar anonimitet të plotë për ata që dëshirojnë të japin informacion.