Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve e sulmeve seksuale. Në shumicën e rasteve viktima po del të jenë edhe të miturat.

Për një rast të tillë që ka ndodhur dje në Prizren, Prokuroria ka nisur hetimet.

Policia e Kosovës në Prizren ka njoftuar se dje rreth orës 14:00 kanë pranuar infromacion se një femër derisa ka qenë në rrugë është përcjellur nga një person i dyshuar.

Policia poashtu, njofton se në lidhje me rastin është njoftuar edhe prokurori kujdestar, ku edhe janë duke u ndërmarr veprime hetimore.

“Prizren 31.01.2023-14:00. Viktima femër kosovare ka njoftuar se derisa ka qenë në rrugë është përcjellë nga një person i dyshuar mashkull. Në lidhje me rastin është njoftuar prokurori kujdestar, ku edhe janë duke u ndërmarr veprime hetimore.” thuhet në raportin e policisë.

Ndërsa, nga burimet e Sinjalit në Prokurorinë e Prizrenit është bërë me dije se vajza e mitur ka denoncuar rastin në Polici, ku ka deklaruar se është ndjekur nga një person i panjohur i moshës madhore.

Bazuar në dëshminë e saj, derisa ajo ka qenë duke shkuar për vizitë te xhaxhai i saj, i dyshuari e ka përcjellur në çdo hap deri në momentin kur ka hyrë brenda një marketi.

I dyshuari edhe aty ka shkuar pas saj, duke i kërkuar shitëses që gjërat të cilat i ka marrë vajza, do t’i paguajë ai. Për ngacmimin nga i dyshuari, e mitura ka njoftuar shitësen duke thënë se ndjehet e frikësuar.