Zyrapi: Rexhep Selimi dhe Sokol Bashota kanë qenë në Drejtorinë Operative të Shtabit të UÇK-së

01.07.2024

Gjatë dëshmisë së tij në Hagë, dëshmitari Bislim Zyrapi, tha se detyrën për të shkuar në Zonën e Drenicës e mori nga Sokol Bashota dhe Rexhep Selimi, të cilët sipas tij kanë qenë në Drejtorinë Operative të Shtabit të Ushtrisë Çlirimtare të Kosovës (UÇK).

Zyrapi: Rexhep Selimi dhe Sokol Bashota kanë qenë në Drejtorinë Operative të Shtabit të UÇK-së Foto: Ilustrim

Fillimisht, iu prezantua një intervistë e tij e dhënë më herët, në të cilën kishte thënë se Rexhep Selimi e kishte ngarkuar Zyrapin me detyrën për të dhënë këshillime në zonën operative të Drenicës

“Po e saktë është. Edhe Sokol Bashota edhe Rexhep Selimi, dytë kanë qenë në Drejtorinë Operative. Kështu që mua më kujtohet se edhe në kohën, të parën kur kam dalë me e vizitu Drenicën ka qenë Sokol Bashota, pastaj me Rexhep Selimin”, tha dëshmitari.

Zyrapi theksoi se gjatë qershorit apo korrikut 1998 ka qenë në Llapushnik dhe se herën e parë tha se ka qenë me Rexhep Selimin, me komandantin e njësisë lokale, si dhe me Fatmir Limajn.

Më pas, për një dokument i cili iu prezantua dëshmitarit, pati kundërshtime mbrojtja e të akuzuarve me pretendimet se nuk kishte vulë, datë dhe nënshkrim. Sipas mbrojtjes, është problematike besueshmëria e dokumentit, e që për këtë arsye duhet kundërshtuar.

Pas këtij dokumenti, u prezantua një tjetër, në të cilin sipas prokurores Clare Laëson ishin vendime për bashkimin e dy njësive të një zone operative. Kurse, Zyrapi tha i se i njeh emrat që përmendeshin në atë dokument.

Gjithashtu, u prezantua edhe një dokument tjetër, në të cilin thuhej se ishte bërë kërkesë për tabela të veturave të UÇK-së.

“E di që ka pas tabela qe janë përdorë me shenjta të UÇK-së, po për Policinë Ushtarake në veçanti nuk e di. Nuk po më kujtohet”, tha Zyrapi, në përgjigje të prokurores Laëson se a kishin makinat e UÇK-së dhe Policia Ushtarake targa të veçanta.

Zyrapi ka nisur dëshminë e tij të premten/ Betimi për Drejtësi