Kanë mbetur më pak se 3 muaj që nga data kur do të mbahen zgjedhjet lokale, 17 tetor.

Partitë politike veçse kanë filluar përgatitjet për këto zgjedhje, duke filluar nga zyrtarizimet e emrave të kandidatëve për kryetarë të komunave.

Deri tani vetëm 8 subjekte politike kanë aplikuar për të marrë pjesë në zgjedhjet lokale të 17 tetorit.

16 gushti është data e fundit për dorëzimin e aplikimit dhe listës së kandidatëve, ndërsa sipas Komisionit Qendror të Zgjedhjeve (KQZ) nuk do të ketë afat shtesë.

Zëdhënësi i KQZ-së, Valmir Elezi për EkonomiaOnline ka bërë të ditur se deri tani kanë aplikuar 5 iniciativa qytetare, 2 kandidatë të pavarur dhe një parti politike.

Sipas Elezit, asnjëra nga këto subjekte nuk është parti parlamentare.

Ndërkaq, i pyetur lidhur me mundësinë që KQZ-ja të zgjasë afatin e aplikimit, Elezi ka thënë se afati i vendosur nga KQZ-ja është mbështetur ne ligj dhe si i tillë nuk mund të ndryshohet.

“Deri më 16 gusht Komisioni Qendror i Zgjedhjeve do të presë aplikimet nga ana e subjekteve politike që duan të marrin pjesë në zgjedhjet e vjeshtës.

Ne jemi në zgjedhje të rregullta, pra edhe afatet të cilat janë vendosur nga KQZ-ja janë të mbështetura në ligjin për zgjedhjet e përgjithshme dhe ligjin për zgjedhjet lokale, prandaj, nuk ekziston mundësia për të pasur një afat shtesë sa i përket kohës së kur subjektet politike duhet të dorëzojnë aplikimet e tyre”, tha Elezi.

Gjithashtu, Elezi bëri të ditur se Komisioni Qendror i Zgjedhjeve do të bëjë verifikimin e kandidatëve nëse janë në përputhje me Nenin 29 të ligjit për zgjedhjet e përgjithshme në bashkëpunim me institucionet tjera, varësisht nga fusha e përgjegjësisë që mbulojnë ato.