Visar Azemi: Ka pasur manipulime me njehsorët elektrikë, qytetarët duhet të kompensohen plotësisht

15.04.2026

Anëtari i LDK-së, Visar Azemi, ka reaguar pas komunikatës së Ministrisë së Industrisë, Ndërmarrësisë, Tregtisë dhe Inovacionit, duke thënë se ajo konfirmon akuzat e LDK-së për keqpërdorime me njehsorët elektrikë në dëm të qytetarëve.

Sipas tij, gjobitja e KEDS-it për përdorimin e njehsorëve me afat të skaduar tregon se sistemi është keqpërdorur, ndërsa qytetarët kanë paguar më shumë sesa që është dashur për energjinë elektrike.

Ai thekson mungesën e transparencës rreth numrit të njehsorëve të prekur dhe vëllimit të gjobave, duke kërkuar sqarime nëse bëhet fjalë për raste të izoluara apo për një problem më të gjerë, duke marrë parasysh numrin e madh të njehsorëve në vend.

Azemi ka ngritur shqetësimin edhe për mënyrën e faturimit, duke pretenduar se disa njehsorë kanë regjistruar gabimisht kohën dhe kanë faturuar energjinë me tarifa të larta edhe gjatë orëve të natës.

Në fund, ai kërkon që të gjithë qytetarët e dëmtuar të kompensohen plotësisht, duke theksuar se gjobat ndaj kompanisë nuk janë të mjaftueshme pa kthimin e mjeteve për konsumatorët.