Sot numërohen votat e fundit, KQZ afër shpalljes së rezultateve përfundimtare

Ndërsa, dje në Qendrën e Numërimit dhe Rezultateve (QNR) ka filluar edhe procesi i rinumërimit të votave në 43 vendvotime të tjera, ku pas rinumërimit të këtyre vendvotimeve, do të bëhet numërimi i votave me kusht dhe atyre të personave me nevoja të veçanta.

Kështu ka bërë të ditur zëdhënësi i Komisionit Qendror të Zgjedhjeve (KQZ), Valmir Elezi, duke shtuar se numërimi i votave me kusht dhe ato të personave me nevoja të veçanta do të fillojë sot në orën 11:00.

Po ashtu, ai ka theksuar se pas rinumërimit të 43 vendvotimeve si dhe numërimit të votave me kusht dhe ato të personave me nevoja të veçanta, KQZ-ja do të bëjë shpalljen e rezultateve përfundimtare.

“Pas përfundimit të procesit për këto 43 vendvotime, Komisioni Qendror i Zgjedhjeve do të fillojë me numërimin e votave me kusht dhe votave të personave me nevoja të veçanta. Besojmë që ky proces do të përmbyllet gjatë ditës së martë.

Kjo do t’i hapte rrugë KQZ-së për të shpallur rezultatet përfundimtare të raundit të parë të Zgjedhjeve Lokale për Kryetarë të Komunave”, ka deklaruar Elezi.