Sa po presin qytetarët për t’u pajisur me pasaportë të Kosovës? Flasin nga MPB-ja
Qytetarë të shumë janë ankuar që pas aplikimit për pasaportë për t’u pajisur me të po shkon më shumë se një muaj.
Foto: Ilustrim
Nga Ministria e Punëve të Brendshme po thonë që kjo nuk qëndron, dhe se qytetari për t’u pajisur me këtë dokument nuk pret një muaj.
Numri i qytetarëve që kanë aplikuar për t’u pajisur me pasaportë nga 1 Janari e deri më 12 Shkurt të këtij viti ka arritur rreth 100 mijë.
“Aplikime për pasaporta prej 01.01.2024 deri më 12.02.2024 janë 96077”, ka treguar zëdhënësja e Ministrisë së Punëve të Brendshme, Nora Fetoshi.
Por, vetëm pak më shumë se gjysma e tyre kanë marrë pasaportën.
“Për periudhën 01.01.2024 deri më 12.02.2024 janë pajisë me pasaportë gjithsej 52674 qytetarë”, ka thënë më tutje Fetoshi.
Ndërsa, nëse krahasohen shifrat e aplikimeve me janarin e vitit të kaluar atëherë dallimi është shumë i madh.
Janë mbi 52 mijë aplikime më shumë në janarin e vitit 2024 nëse krahasohet me janarin e vitit 2023.
“Gjatë muajit janar 2023 kanë qenë gjithsej 18427 aplikime për pasaporta, kurse gjatë muajit janar 2024 kanë qenë gjithsej 71096 aplikime për pasaporta”, është shprehur Fetoshi.
